დავით საყვარელიძე

დავით საყვარელიძემ 1995 წელს დაამთავრა თბილისის თეატრალური ინსტიტუტი (მიხეილ თუმანიშვილის სახელოსნო). მისი სადიპლომო ნაშრომი "ქორწინება კონკურსით" (კარლო გოლდონის პიესის მიხედვით) დაიდგა თბილისის მოზარდ მაყურებელთა რუსული თეატრის სცენაზე. დავით საყვარელიძემ სტაჟირება გაიარა: მილანის თეატრში Piccolo Teatro di Milano რეჟისორ ლუკა რონკონის ხელმძღვანელობით, სადაც დადგა თანამედროვე წარმოდგენა "უსასრულობა"; იელის უნივერსიტეტში სპეციალობით - განათების მხატვრობა (ჯენიფერ ტიფტონის ხელმძღვანელობით); ლონდონის ნაციონალურ ოპერაში, სადაც იგი დამდგმელი რეჟისორის ასისტენტი იყო. დავით საყვარელიძემ ამ თეატრის სცენაზე ლეონკავალოს ნაკლებად ცნობილი ოპერა "ბოჰემა" დადგა. რეჟისორი ლონდონის ნაციონალური თეატრის სტუდიაში რეჟისორ პიტერ ბრუკთან ერთად მუშაობდა პროექტზე "ვინ მოდის მანდ მომავლიდან", რომელიც ეხებოდა XXI საუკუნის რეჟისურის პრობლემებს. ნიუ-იორკის თეატრში Play Time Studio დადგმული აქვს სპექტაკლი "მენთოლიანი სასმელი" ჯეიმს პინკოვსკის პიესის მიხედვით. დავით საყვარელიძეს დადგმული აქვს სპექტაკლები სხვადასხვა თეატრებში: შოთა რუსთაველის სახელობის თეატრი - "პირდაღებული" ხანოხ ლევინის პიესის მიხედვით, "ვიწრო ბილიკი ჩრდილოეთისკენ" ედუარდ ბონდის პიესის მიხედვით (სოხუმის კონსტანტინე გამსახურდიას სახელობის თეატრის დასის სპექტაკლი), "ქალი-გველი" კარლო გოცის პიესის მიხედვით (რობერტ სტურუასთან ერთად); კოტე მარჯანიშვილის სახელობის თეატრი - "თითით საჩვენებელი" ბასა ჯანიკაშვილის პიესის მიხედვით, "ფრანკენშტაინი" ლაშა ბუღაძის პიესის მიხედვით; კინომსახიობთა მიხეილ თუმანიშვილის სახელობის თეატრი - "ტარტიუფი" ჟან ბატისტ მოლიერის პიესის მიხედვით; სამეფო უბნის თეატრი - "პარკი" ბოტო შტრაუსის პიესის მიხედვით, "სახლი საზღვარზე" სლავომირ მროჟეკის პიესის მიხედვით, "ის არის აქ" ნატალი საროტის პიესის მიხედვით, "ქალი ხეზე" ჯარჯი აქიმიძის და დათო ტურაშვილის პიესის მიხედვით; თეატრალური სარდაფი - "ოთარი" ლაშა ბუღაძის პიესის მიხედვით; თბილისის სახელმწიფო კონსერვატორიის დიდი დარბაზი - ჯაკომო პერის "ევრიდიკე"; თბილისის ოპერისა და ბალეტის თეატრი - პიეტრო მასკანის "სოფლის ღირსება", "აიდა", "რიგოლეტო", "ატილა".
დავით საყვარელიძე არის კავკასიური თეატრალური ლაბორატორიის დამფუძნებელი. მას ეკუთვნის 30 თეატრალური დადგმის და მხატვრული ფილმის მუსიკალური გაფორმება, დადგმული აქვს 25-ზე მეტი სპექტაკლი, 30-ზე მეტი თეატრალიზებული კონცერტი.
2004-2009 წლამდე იგი თბილისის ოპერისა და ბალეტის სახელმწიფო  თეატრის გენერალური დირექტორი იყო, 2009 წლიდან დღემდე თბილისის ოპერისა და ბალეტის სახელმწიფო  თეატრის მმართველია.

იხილეთ CV