თბილისის ოპერის სცენაზე „სოფლის ღირსება“ ცოცხლდება - შედევრი, რომელმაც 26 წლის უცნობი კომპოზიტორი ერთ დღეში აქცია ოპერის მსოფლიო ისტორიის ნაწილად. 
 
სიცილიური სოფელი, სიმღერა, ღვინო, სიყვარული, ღირსება, და შურისძიება აღდგომის დილას - თბილისის ოპერისა და ბალეტის სახელმწიფო თეატრი იტალიური ვერიზმის მუსიკალურ მანიფესტს წარმოგიდგენთ!

შინაარსი

აღდგომის დილა სიცილიის პატარა სოფელში.

შორიდან ტურიდუს სიმღერის ხმა ისმის - ის რამდენიმე წუთის წინ დაემშვიდობა საყვარელს, მეეტლე ალფიოს ცოლს, ლოლას.

მოედანზე თავს იყრიან სოფლის მცხოვრებნი. ზოგი მესაზე მიიჩქარის, ზოგიც უსაქმოდ დაეხეტება.

ეკლესიის პირდაპირ ტურიდუს დედის, ლუჩიას ტავერნაა. აქ მოდის ეჭვებით გატანჯული სანტუცა, ტურიდუს საცოლე. ის უამბობს დედა ლუჩიას, რომ ტურიდუ გუშინ ღვინის საყიდლად ფრანკოფონტეში კი არ წასულა, არამედ წუხანდელი ღამე სოფელში, ლოლასთან გაატარა. სანტუცას ნაამბობიდან ირკვევა, რომ ტურიდუ და ლოლა ადრე დაქორწინებას აპირებდნენ, მაგრამ ახალგაზრდა კაცი საომრად წავიდა, დაბრუნებულს კი ლოლა უკვე ალფიოზე გათხოვილი დახვდა. ტურიდუმ ტკივილის განელება ახალი სიყვარულით სცადა და სანტუცა შეიყვარა. მაგრამ, ახლა ლოლა შეიპყრო შურმა და ეჭვებმა და კვლავ თავბრუ დაახვია ტურიდუს. მიტოვებული და პატივაყრილი სანტუცა კი წუხილის გასაზიარებლად დედა ლუჩიასთან მოვიდა.

თავზარდაცემული ლუჩია სალოცავად ეკლესიაში მიდის, ტავერნაში  დაბრუნებულ ტურიდუს კი სანტუცა ხვდება. იწყება დაძაბული დიალოგი, ტურიდუ დაჟინებით  უარყოფს სანტუცას ბრალდებებს. მათ შეხლას ლოლას გამოჩენა წყვეტს, რაც სანტუცას ეჭვებს და შფოთვას კიდევ უფრო აძლიერებს. ტურიდუ ლოლას დაედევნება, სანტუცას ამაო ხვეწნა-მუდარა, საბოლოოდ, წყევლით იცვლება: „ცუდი აღდგომა დღე გაგითენდა, ვფიცავ ყველაფერს!“ - დაადევნებს ის ყოფილ საქმროს.

სანტუცა ასრულებს თავის მუქარას. ალფიოს ქუჩაში ხვდება და მისი  ცოლისა და ტურიდუს ღალატზე უყვება. „მზის ჩასვლამდე ვიძიებ შურს ღალატისათვის!“ - იფიცებს ალფიო.

ეკლესიიდან გამოსულ სოფლელებს ტურიდუ დედა ლუჩიას ტავერნაში ჭიქა ღვინოზე ეპატიჟება. ალფიოს გამოჩენისას სიტუაცია იძაბება. ის უარს ამბობს მასპინძლის შემოთავაზებულ ღვინოზე და სოფლის გარეთ დანებით ორთაბრძოლაში იწვევს მას. ტურიდუ არ უარყოფს ბრალდებას, მის გამოსასყიდად სიკვდილისთვისაც მზადაა, მაგრამ სანტუცას გამო თავს ვალდებულად გრძნობს, საკუთარი სიცოცხლისთვის ალფიოს გული გაუგმიროს.

დედასთან მარტო დარჩენილი ტურიდუ სთხოვს მას, იზრუნოს სანტუცაზე, თუკი მას რამე შეემთხვევა.

დედა ლუჩია დაედევნება გაქცეულ შვილს, კარებში მას სანტუცა ხვდება. შორიდან მომავალი გაურკვეველი ყვირილის ხმა ახლოვდება მათ ყურთასმენას სწვდება საშინელი სიტყვები: „ტურიდუ მოკლეს“.