15, 17 და 19 ივნისს  ნინო სურგულაძის საქველმოქმედო ფონდი „ნატვრის  ხე“,  თბილისის ოპერის თეატრის საბალეტო დასი და ორკესტრი,  თეატრის სცენაზე მაყურებელს მსოფლიო პრემიერას  შესთავაზებს.

სპექტაკლი   „სიყვარულისთვის“  ორი ნაწილისაგან შედგება და  ოპერისა და ბალეტის სინთეზს წარმოადგენს, რომელშიც ერთობლივადაა წარმოდგენილი ნინო როტას სუიტაზე (ფედერიკო ფელინის ფილმიდან La Strada) დადგმული ბალეტი  და ფრანსის პულენკის მონო ოპერა „ადამიანის ხმა“.

პირველ ნაწილში მთავარ როლს პრიმა-ბალერინა ნინო ანანიაშვილი შეასრულებს, პულენკის მონო ოპერას კი მსოფლიოში სახელგანთქმული მეცო-სოპრანო ნინო სურგულაძე იმღერებს.
სპექტაკლის დადგმა იტალიელმა ხელოვანებმა განახორციელეს:  რეჟისორი მარკო გარდინი, ცნობილი იტალიელი რეჟისორის  ფრანკო ძეფირელის პარტნიორია,  დამდგმელი ქორეოგრაფი ჯანლუკა სკიავონი   კი ლა სკალასა და მსოფლიო  სხვა თეატრებში მოღვაწეობს.   
სპექტაკლებს   მაესტრო კარლო პონტი უდირიჟორებს.
15 ივნისის საქველმოქმედო სპექტაკლს საპატიო სტუმრის სტატუსით მსოფლიო   კინოვარსკვლავი სოფია ლორენი დაესწრო. ამ სპექტაკლიდან შემოსული თანხა მთლიანად მოხმარდება მძიმე სენით დაავადებული ბავშვების მკურნალობას.